„Со оваа наша реакција сакаме да ги охрабриме на чекор, да ги послушаат реакциите на граѓаните за прекин на колективното казнување цивили во Газа и непочитување на меѓународното хуманитарно право“
Неколку невладини организации кои дејствуваат во Северна Македонија упатија реакција до претседателот на државата, Стево Пендаровски, до премиерот, Димитар Ковачевски, до целата Влада, и до претседателот на Собранието, Талат Џафери, во врска со односот на државата кон случувањата во Газа, пренесува Анадолу.
„Следејќи ја внимателно трагичната состојба на цивилното население во Газа, ужаснати сме од молкот, воздржаното гласање за хуманитарната резолуција во Обединетите нации и едностраноста на нашите политичари кои во ниту еден момент не собраа храброст да ги исправат своите ставови и да застанат на страната на оние кои повикуваат на мир и разум“, се наведува во соопштението на Платформата за Палестина, која се состои од неколку невладини организации во земјата.
Во соопштението се нагласува дека бројката на жртви во Газа ја надминала онаа на геноцидот во Сребреница, а стотина вработени во меѓународните хуманитарни организации и новинари исто така ги загубија своите животи.
„Со оваа наша реакција до претседателот на Република Северна Македонија, Стево Пендаровски, до премиерот на Владата, Димитар Ковачевски, и до целата Влада, како и до претседателот на Собранието, Талат Џафери, сакаме да ги охрабриме на еден таков чекор и да ги послушаат реакциите на граѓаните кои ги преплавуваат социјалните мрежи со солидарност и повик за прекин на колективното казнување цивили во Газа и непочитување на меѓународното хуманитарно право“, се вели во соопштението.
Исто така, во соопштението е наведена листа на барања упатени до државниот врв на Северна Македонија:
„1. Покрај вашата осуда на нападот на Хамас врз цивилните цели, бараме остра осуда на масакрот врз цивилите што Израел го врши во Газа, со што секојдневно го крши меѓународното хуманитарно право.
2. Апелирајте за итен прекин на неселективното бомбардирање и убивањето цивили во Газа и усвојте декларација во Парламентот со која се повикува на престанок на војната и се дава шанса на мирот. Организирајте комисиска седница и искористете ги сите потребни институционални механизми.
3. Испратете итна медицинска помош во Газа во име на нашата држава и на граѓаните.
4. Обезбедете бесплатно лечење и рехабилитација на повредените дечиња од Газа кои во оваа агресија изгубија делови од своите екстремитети, во болниците во Македонија. (По примерот на Кабинетот на претседателот на Р Словенија).
5. Не потклекнувајте под притисокот за прогон на сите оние кои го креваат својот глас против масакрот на цивилите во Газа, за кој денес сме сведоци, а за кој апелираме да престане и да се замени со безусловен мир.“
Во тековниот израелско-палестински конфликт од 7 октомври загинаа над 10.600 луѓе, меѓу кои најмалку 9.227 Палестинци и над 1.500 Израелци.
AA
