Medin Nuredini 
Дел од проектите веќе се во изградба или подготовка, а за железничката линија кон Косово министерот за транспорт Александар Николоски најави дека би можела да биде воспоставена во 2027 година.
Најголемите инфраструктурни зафати се поврзани со Коридорите VIII и X, преку кои Македонија треба да се поврзе со железничките мрежи на Бугарија, Србија и Грција.
Кон Софија, во мај 2027 година е најавен почетокот на изградбата на последната делница од македонската страна – од Крива Паланка до границата со Бугарија. Делницата е долга околу 23 километри. Пругата од Куманово до Бељаковце, долга околу 31 километар, веќе е завршена, додека делницата Бељаковце–Крива Паланка е во изградба. Според плановите, таа треба да биде завршена во 2028 година.
За изградбата на источниот железнички коридор е обезбеден финансиски пакет од околу 560 милиони евра, преку заеми од Европската инвестициска банка и Европската банка за обнова и развој, како и европски грантови.
Кон Белград, плановите се поврзани со модернизацијата на Коридорот X. Во април 2027 година е најавен почеток на работите на железничката траса од Табановце до Гевгелија. Проектот предвидува модернизација и електрификација на пругата, како и изградба на втор колосек на одредени делови. Предвидено е патничките возови да можат да достигнуваат брзина до 160 километри на час.
Оваа железничка врска е дел од правецот Белград–Скопје–Солун. Со модернизацијата на македонскиот дел и проектите што се реализираат северно од границата, целта е да се подобри железничката поврзаност долж Коридорот X.
Третата најавена врска е кон Приштина. Министерот Николоски изјави дека од следната година би можело повторно да се патува со воз меѓу Скопје и Приштина.
Според неговата најава, на косовска страна се работи на модернизација на железничката инфраструктура и треба да се заврши уште еден тунел. По завршувањето на работите, на македонска страна би биле потребни дополнителни четири до шест месеци за подготовка на пругата.
Николоски најави дека патувањето од центарот на Скопје до центарот на Приштина би траело околу 50 минути. Тој посочи и дека дневно повеќе од 10.000 возила се движат меѓу Македонија и Косово, што според него покажува дека постои значителен сообраќаен потенцијал за железничка линија.
Така, во плановите за развој на железничкиот сообраќај Скопје се поставува како точка од која би се патувало кон Софија на исток, Белград на север и Приштина на северозапад, а преку Коридорот X и кон Солун на југ.
Пругата кон Бугарија сè уште се гради, модернизацијата на Коридорот X е во подготвителна фаза, додека повторното воспоставување на линијата Скопје–Приштина е најава која зависи и од завршувањето на работите на косовска страна. Доколку најавената динамика биде исполнета, следните години би можеле да донесат значително поголема железничка поврзаност на Скопје со главните градови во соседството.
