Medin Nuredini 
Заврши изведувањето на доказите на Јавното обвинителство во судскиот процес за пожарот во Кочани, а од 1 октомври е предвидено да започне доказната постапка на одбраната, која предложила сослушување на 244 сведоци.
Според информациите објавени од Основниот кривичен суд Скопје, изведувањето на доказите на Обвинителството завршило на 14 септември.
Во досегашниот тек на постапката биле изведени 1.309 материјални докази, а биле сослушани 45 сведоци и пет вешти лица.
Од почетокот на судењето досега се одржани вкупно 49 рочишта, од кои девет во 2025 година и 40 во 2026 година. Според Судот, ниту едно рочиште не било одложено.
Процесот продолжува со доказите предложени од одбраната. За периодот до крајот на 2026 година се закажани уште 15 рочишта – шест во октомври, пет во ноември и четири во декември. Последното закажано рочиште за годинава е на 24 декември.
Со почетокот на доказната постапка на одбраната, судскиот процес влегува во следната фаза, во која ќе се изведуваат доказите и ќе се сослушуваат сведоците предложени од обвинетите и нивните бранители.
Ова беше соопштено денеска на брифинг со новинарите во Основниот кривичен суд Скопје, на кој претседателката на Судот, Даниела Димовска, информираше за актуелните судски процеси, меѓу кои и за пожарот во Кочани, како и за следните фази од постапката.
Според информациите презентирани на брифингот, Обвинителството го заврши изведувањето на своите докази, а од 1 октомври е предвидено да започне изведувањето на доказите на одбраната, која предложила 244 сведоци.
