Medin Nuredini 
Во Охрид е отворена Четвртата годишна конференција на Форумот на уставните судови на Балканот, на тема „Современи предизвици за владеењето на правото: Улогата на уставните судови“.
Конференцијата ги собра претставниците на уставните судови на балканските земји, кои дискутираат за предизвиците со кои се соочуваат уставните системи во современото време, особено во однос на заштитата на независноста на уставното судство, зајакнувањето на демократијата и зголемувањето на довербата на граѓаните во судските институции.
На отворањето на Конференцијата, претседателот на Уставниот суд на Република Северна Македонија, Дарко Костадиновски, ја истакна важноста на независноста на судиите, како и зајакнувањето на довербата на граѓаните преку транспарентност и разбирливи одлуки.
Според него, независноста на уставните судови е суштинска за владеењето на правото, која „добива вистинска содржина кога судијата има знаење, интегритет и храброст да одлучува според сопственото правно убедување, ослободен од политички влијанија, лични преференции и интереси, или очекувања за јавна наклонетост“.
Костадиновски зборуваше и за можностите и ризиците од употребата на вештачката интелигенција во правосудството, посочувајќи дека технолошкиот напредок создава можности, но истовремено го постави прашањето дали вештачката интелигенција некогаш може да ги замени совеста, етиката, моралниот интегритет и независното правно убедување на еден судија.
Според официјалното соопштение, Конференцијата, што се одржува од 12 до 14 ноември, има цел и да поттикне дијалог и размена на искуства меѓу уставните судови во регионот, придонесувајќи за идентификување на заедничките предизвици и зајакнување на регионалната соработка.
AA
