Загрижувачкo намалување на бројот на ученици: Околу 3.000 првачиња помалку ќе тргнат на училиште во септември

Министерката за образование и наука Весна Јаневска посочи дека во учебната 2026/2027 година се очекува да има најмалку 3.000 првачиња помалку во споредба со минатата година, оценувајќи дека трендот на намалување на бројот на ученици е загрижувачки.

На прес-конференција, на која беа презентирани резултатите од државната матура, Јаневска рече дека во моментов бројот на запишани првачиња е за околу 4.900 помал од лани, но очекува дел од децата дополнително да се запишат во наредниот период.

„Во овој момент бројката е 4.900 првачиња помалку од лани. Но, ќе се дозапишуваат и во овој период. Бројката ќе стигне најмногу до 3.000. Значи, сигурно ќе имаме 3.000 првачиња помалку од лани“, изјави Јаневска.