Medin Nuredini 
Министерството за образование и наука го објави официјалниот конкурс за упис во средните училишта во учебната 2026/2027 година, со што учениците со завршено основно образование ќе можат да конкурираат за над 25.000 слободни места во сите 109 јавни средни училишта во државата.
Најголем дел од слободните места се во средното стручно образование – 17.000, додека во гимназиските училишта се предвидени речиси 6.000 места. За уметничките училишта се резервирани 570 слободни места.
Учениците ќе се пријавуваат електронски преку порталот Uslugi.gov.mk, со користење на посебна најава преку своите кориснички сметки на schools.mk. Потоа, во училиштата каде што ќе конкурираат, треба да ја достават потребната документација.
За првиот уписен рок во јуни ќе има две пријавувања: првото од 12 до 15 јуни, а второто на 23 јуни. Вториот уписен рок, во август, е закажан за 20 август, кога учениците повторно ќе имаат можност да конкурираат.
Овој конкурс е клучен за идниот избор на струка и кариера на учениците, особено за оние кои се ориентирани кон стручното образование, каде што е достапен најголем број на места.
