Medin Nuredini 
Турскиот амбасадор во Скопје, Фатих Улусој, оствари учтивостна посета кај градоначалникот на Град Скопје, Орце Ѓорѓиевски.
Градоначалникот Орце Ѓорѓиевски на својот профил на социјалните мрежи објави соопштение во кое истакна:
„Денес одржав работна средба со делегацијата на Република Турција во Македонија, предводена од амбасадорот Фатих Улусој.
Во делегацијата беа присутни и трговскиот советник на Амбасадата на Република Турција, Синан Танриоген, третата секретарка Ирем Нур Тајшер, заменик-координаторот на канцеларијата на ТИКА во Скопје, Догукaн Канан, претставникот на Турскиот културен центар на Институтот „Јунус Емре“ во Македонија, Бекир Ибиш, како и претставникот на Фондацијата „Мариф“ во Македонија и координатор на меѓународните училишта, Осман Демиргул.
Го информирав амбасадорот Улусој за програмата и визијата што ја подготвивме за модерно, паметно и современо Скопје, како и за нашата јасна решеност за забрзан развој на градот.
Заедно ја потенциравме долгогодишната соработка и традиционално добрите односи меѓу двете земји.
Разговаравме за тековните активности на Град Скопје и можностите за понатамошно унапредување на партнерството, особено во областа на урбаниот развој, инфраструктурните проекти, културната размена и соработката со бизнис заедницата.
Исто така, посебен акцент ставивме на потенцијалните иницијативи што би донеле конкретни придобивки за скопјани и на размената на добри практики во локалното управување.
Ја изразив решеноста на Град Скопје за продлабочување на односите со Република Турција, а амбасадорот Улусој ја истакна континуираната поддршка што Турција ја дава за развојните процеси на нашиот град.
На крај, заеднички го потврдивме постојниот потенцијал за нови иницијативи и активности што ќе придонесат за подобрување на квалитетот на живот на скопјани и за уште посилно унапредување на меѓусебната соработка.
