Medin Nuredini 
Министерството за здравство се отвори за жалби на граѓаните од здравствениот систем. Граѓаните веќе можат секоја забелешка, жалба од функционирањето на здравството, недостапна здравствена услуга или злоупотреба на клиниките да ја пријават на веб-страницата на Министерството за здравство. Оваа новина ја претстави утрово министерот за здравство Азир Алиу.
„Може да се пријави подолго чекање на некоја клиника или некоја нерегуларност. Има можност да се приложат и фотографии и документи како докази“, рече министерот Алиу.
Пријавата е анонимна, но оние кои сакаат, ќе можат да остават телефонски број на кој би можеле да бидат побарани за да им се реши проблемот, а можат и да испратат фотографии и документи за проблемот што го имаат.
Министерот Алиу најави дека на крајот на секој месец ќе објавуваат за кои клиники стигнале најмногу пријави и жалби од граѓаните.
Ова не е единствената техничка новина откако за министер е дојден Азир Алиу кој претходно беше министер за информатичко општество и администрација. Од викендов на веб- страницата на Министерството за здравство преку алатката „Отворен кабинет“ граѓаните можат да закажат 15-минутна средба со министерот секој петок. Министерот Алиу за оваа алатка објасни дека не е само техничка новина туку став дека институциите ора да ги слушаат граѓаните.
На веб-страницата на Министерството за здравство поставена е и посебна апликација преку која приватните специјализанти можат да изразат интерес за вработување во јавните здравствени установи.
ZOOM
