Денеска во Собранието ќе биде свечено промовирана и пуштена во употреба заштитената соба и заштитениот работен простор.
Заштитената просторија и работниот простор се проектирани да ги исполнуваат строгите безбедносни стандарди на НАТО и Европската Унија. Просторот е изграден со материјали кои спречуваат неовластено следење и прислушување, обезбедувајќи сигурна и доверлива комуникација.
Според информации од собраниската веб-страница, заштитената просторија и работниот простор се резултат на стратешкото партнерство помеѓу Собранието на РСМ и Женевскиот центар за управување со безбедносниот сектор (ДЦАФ). Ова партнерство го нагласува стремежот за зајакнување на демократското владеење и обезбедување на сеопфатни механизми за одговорност во безбедносниот сектор на земјата.
Проектот ги следи најдобрите практики во управувањето со безбедносниот сектор и обезбедува флексибилност за идни подобрувања во надзорот на безбедноста и разузнавањето. Просторијата ќе биде наменета за потребите на Собранието и неговите комисии, кои работат со класифицирани информации, а исто така може да биде достапна и за други државни органи со одобрување од Собранието.
Процесот за реализација на овој проект помина низ шест јавни повици, при што повеќето беа неуспешни поради несоодветни понуди, како што претходно објаснуваше Талат Џафери. Последниот јавен повик, сепак, беше успешен, а изградбата на заштитената соба започна во јули 2023 година, според информации од ДЦАФ.
TV21
