Техничкиот премиер Талат Џафери, денеска го посети Меѓународниот балкански универзитет во Скопје.
На средбата со раководството на Универзитетот, научниот и стручниот кадар, Џафери, беше информиран за функционирањето и тековните активности што се реализираат во оваа високообразовна установа.
Универзитетот е составен од седум факултети, покрива вкупно 65 области во додипломски, постдипломски и докторски студии, информираат денеска од владината прес-служба.
Тој изразил задоволство од опстојувањето и функционирањето на Универзитетот истакнувајќи дека, вакви напредно високообразовни институции се од голема важност за исклучителните достигнувања на студентите во натамошниот нивен професионален развој.
За време на средбата, разговараа и за предизвиците во високото образование во земјата, неопходните реформи и системски решенија, кои треба да се спроведат во образованието, како едни од основните предуслови за продуцирање квалитетен кадар, при што, премиерот посочи дека Владата, секогаш имала и ќе има слух за потребите на образовните установи во кои се гради иднината на земјата.
Претседателот на Владата, Џафери, изврши обиколка на кампусот и го посети Факултетот за дентална медицина, акушерство и медицински сестри, каде годинава е направена најголемата инвестиција за дентална медицина од страна на Универзитетот, се вели во соопштението од Владата.
Од Владата додаваат дека во рамки на Факултетот е основана и ПЗУ „ИБУ ДЕНТ“ и премиерот Џафери, бил информиран за условите и медицинските услуги кои што се овозможени овде.
Од голема важност е, како што додаваат од Владата, современата опрема со која е опремена ординацијата, како и експертизата која ја нуди оваа установа во состав на Факултетот, со што на студентите им се овозможува пракса во реални услови.
