Софија не бара Бугарите да бидат наведени само во Преамбулата на Уставот, туку и во неговиот нормативен дел, изјави претседателот Стево Пендаровски во интервју за ТВ24.
Пендаровски вели дека ниту една заедница во државата не е внесена во нормативниот дел на Уставот, па оттука не е можно да влезат ниту Бугарите.
– Во нормативниот дел на Уставот сега се споменуваат само македонскиот народ, Македонците кои живеат надвор од границите на државата, МПЦ и Исламската верска заедница – посочи Пендаровски.
Софија, вели претседателот, не зборува за „Бугари“, туку за „македонски Бугари“, нешто што е враќање кон „рамната теза“ за дебугаризација на Македонија.
За Пендаровски е неприфатливо во преговарачката рамка со ЕУ да влезат историски прашања и оспорување на јазикот.
Претседателот смeта дека премиерот Димитар Ковачевски не треба да оди в четврток на Самитот ЕУ-Западен Балкан во Брисел, кој се одржува пред состанокот на Европскиот совет, на кој треба да се одлучи дали ќе почнат пристапните преговори на ЕУ со земјава.
Според Пендаровски, Ковачевски нема што да бара во Брисел, особено што на вчерашниот состанок на амбасадорите на земјите-членки на ЕУ, бугарската страна изнела нови барања за симнување на ветото за Македонија.
– Јас го советувам премиерот да не оди во Брисел. Пред неколку дена разговаравме на таа тема и мојот совет беше дека ако вака се одвиваат работите и ако Бугарите вчера доставиле пет нови барања, тогаш што бара премиерот таму само за да се слика? Замислете, самит ЕУ-Западен Балкан кога целиот регион, ние пред сè, не напредуваме, само да се сликаме – рече Пендаровски.
Претседателот вели и дека вакви понижувања и потценувања какви што имавме во последниве две години од Бугарија не сме доживеале за 20 години преговори со Грција.
-Ние политичарите од мали држави често пати сме во ситуација да попуштаме, да потклекнеме, но мислам дека изминативе две години вакво национално тормозење од страна на Бугарија кон нас не сме имале во 20 години преговори со Грција – истакна Пендаровски.
Тројцата лидери на земјите вклучени во Отворен Балкан, Димитар Ковачевски, Александар Вучиќ и Еди Рама, најавија дека по меѓусебни консултации утре ќе одлучат дали ќе одат во Брисел.
