Medin Nuredini 
Во балканските земји Северна Македонија, Албанија, Косово, Босна и Херцеговина, Србија, Црна Гора и Хрватска, со церемонии беше одбележана 88-годишнината од смртта на Мустафа Кемал Ататурк, основачот на Република Турција, јавува Анадолу.
На церемонијата организирана во резиденцијата на Амбасадата, чиј домаќин беше амбасадорот на Турција во Скопје, Алпер Акташ, присуствуваа претставници на турските институции и организации во земјата.
По едноминутното молчење во 9:05 часот во резиденцијата на Амбасадата, беше интонирана турската национална химна.
Третиот секретар на Амбасадата, Елиф Сал, во своето обраќање рече дека 10 ноември за турскиот народ не е само денот кога го загубил големиот лидер, туку и значаен ден кога повторно се потсетува на вредностите на Републиката, идеалот за независност и целта за модернизација што тој им ги оставил во аманет.
– Албанија –
Комеморација по повод 88-годишнината од смртта на Мустафа Кемал Ататурк беше одржана и во главниот град на Албанија, Тирана.
На церемонијата организирана во присуство на амбасадорот на Турција во Тирана, Бариш Џејхун Ерџијес, учествуваа претставници на турските институции и организации во земјата.
Церемонијата започна со едноминутно молчење и интонирање на Националната химна на независноста.
Третиот секретар Бурџу Јакиџи, во своето обраќање истакна дека Ататурк, како лидер со идеи кои ја надминувале неговата епоха, преку значењето што им го придавал на образованието, науката, уметноста и културата, му покажал на целиот свет дека развојот и напредокот се можни не само преку економска и воена моќ, туку и преку богатството на образованието, мислата и културата.
– Косово –
Церемонија беше одржана и во главниот град на Косово, Приштина, по повод 88-годишнината од смртта на Ататурк.
На церемонијата организирана во резиденцијата на Амбасадата на Турција во Приштина присуствуваа привремениот вршител на должноста амбасадор на Турција во Приштина, Бабур Хизлан, потпретседателот на Турската демократска партија на Косово (КДТП) и заменик-министер за одбрана на Косово, Енис Керван, пратеничките на КДТП, Фатма Тачи и Ергул Мазрек, заменик-командантот на мировните сили на НАТО на Косово (КФОР), бригадниот генерал Онур Чакиџи, како и претставници на турските институции во Косово и бројни гости.
Церемонијата започна со едноминутно молчење и интонирање на Националната химна на независноста.
Хизлан во своето обраќање рече дека на Мустафа Кемал Ататурк и неговите соборци се сеќаваат со почит, благодарност и признание.
Церемонијата заврши со обраќање посветено на значењето и важноста на овој ден.
Во меѓувреме, по повод 88-годишнината од смртта на големиот водач Мустафа Кемал Ататурк, комеморативни програми беа организирани и во градот Призрен, во јужниот дел на Косово.
– Босна и Херцеговина –
На церемонијата организирана во Амбасадата на Турција во Сараево, чиј домаќин беше амбасадорот Емин Аксеки, присуствуваа голем број вработени во Амбасадата и претставници на турските институции и организации.
Аксеки во своето обраќање рече дека на Мустафа Кемал Ататурк се сеќаваат со почит и благодарност, истакнувајќи дека Ататурк и неговите соборци воделе големи битки за одбрана на татковината, одиграле значајна улога во стекнувањето на независноста на турскиот народ и дека е важно наследството што го оставил да им биде пренесено на идните генерации.
– Србија –
Учесниците на церемонијата организирана во Амбасадата на Турција во Белград, чиј домаќин беше амбасадорот Илхан Сајгили, положија каранфили покрај фотографијата на Ататурк.
Сајгили рече дека чувствува почит, копнеж и благодарност кон Ататурк, додавајќи: „Постојат лидери кои им даваат облик само на времињата во кои живеат, а постојат и лидери кои ја обликуваат иднината. Нашиот татко беше еден од тие големи лидери“.
– Хрватска –
На церемонијата организирана во главниот град на Хрватска, Загреб, чиј домаќин беше амбасадорката Нурдан Ерпулат Алтунташ, присуствуваа амбасадорот на Азербејџан во Загреб, Анар Иманов, претставници на турските институции и организации, граѓани, како и академици и студенти од Катедрата за турски јазик на Универзитетот во Загреб.
Амбасадорката Алтунташ рече дека Ататурк успеал да оствари бројни победи, успеси и реформи во својот краток живот, истакнувајќи дека, и покрај тоа што поминале многу години од неговата смрт, младите и натаму го паметат со љубов и почит.
– Црна Гора –
На церемонијата организирана во Амбасадата на Турција во Подгорица, чиј домаќин беше амбасадорката Ајда Унлу, присуствуваа претставници на турските институции и организации, како и вработени во Амбасадата.
Унлу во своето обраќање рече дека сеќавањето на Ататурк добива значење кога е проследено со негово разбирање, истакнувајќи дека 10 ноември не треба да служи само за сеќавање на Ататурк, туку и за разбирање на неговите идеи и борба.
