Премиерот на Бугарија Кирил Петков денеска заминува за Брисел, каде ќе учествува на состанокот на членовите на Европскиот совет, соопшти владината прес-служба во Софија.
Како што јави дописникот на МИА од Софија, европските лидери ќе разговараат за ситуацијата меѓу Русија и Украина. Програмата на бугарскиот премиер Кирил Петков ќе продолжи со учество на Шестиот самит меѓу Европската унија и Африканската унија што ќе трае два дена.
Форумот на највисоко ниво е иницијатива на Франција, која претседава со ЕУ, и има за цел да создаде амбициозен и ориентиран кон иднината сојуз со Африка, кој може да изгради област на просперитет и стабилност. Друга важна тема за време на самитот во Брисел ќе биде пандемијата на Ковид-19.
