Утре втор круг од изборите за градоначалник на Брвеница, денеска гласаат болните и изнемоштените лица

Вториот круг од предвремените избори за градоначалник на Општина Брвеница ќе се одржи утре, 1 ноември, додека денеска во општината гласаат болните и изнемоштените лица. Синоќа на полноќ започна изборниот молк за вториот круг.

Првиот круг од предвремените избори се одржа пред две недели, на 18 октомври. На изборите на 18 октомври право на глас имаа 16.256 граѓани. Излезноста изнесуваше 46,56 проценти, односно гласале вкупно 7.565 избирачи. Бидејќи ниту еден од кандидатите не го освои потребното мнозинство гласови, во општината ќе се одржи втор круг на гласање.

Предвремените избори за градоначалник беа организирани по ненадејната смрт на тогашниот градоначалник Јовица Илиевски.