Medin Nuredini 
Во Хрватска во тек се локални избори каде граѓаните ги бираат локалните власти во повеќе од 570 локални единици, од над 30.000 кандидати претставници на властите во советите и собранијата на општините, градовите и жупаниите, како и градоначалници на општини, градоначалници на градови и жупани.
На секои четири години, Хрватска организира локални избори во третата недела во мај, а на овогодинешните избори се кандидираа 31.082 кандидати, што е за 7.770 помалку отколку на изборите пред четири години.
Повеќе од 3,5 милиони гласачи ќе одлучат кој ќе ја води локалната самоуправа оваа година.
Изборите се одржуваат во 576 локални единици, од кои во 428 општини, 127 градови и 20 жупании, како и во главниот град Загреб, кој има статус на град и жупанија.
Кампањата за локалните избори заврши на полноќ во петокот и започна изборниот молк, кој трае до 19 часот, односно до затворање на 6.600 избирачки места.
Државната изборна комисија (ДИК) апелираше до сите актери во изборите, како и до граѓаните и медиумите, да го почитуваат молкот.
Припадниците на националните малцинства ќе изберат од своите редови, меѓу останатите, десет заменици-жупани, 18 заменици-градоначалници на општини и 39 заменици-градоначалници на градови.
Аналитичарите проценуваат дека локалните избори оваа година ќе бидат неизвесни.
Изборната трка за градоначалник на Загреб привлекува најголемо внимание, а фокусот на јавноста е и на локалните избори за Риека, Осиек и Сплит.
AA
