Во Софија денеска претседателката Гордана Сиљановска-Давкова ги посети повредените од пожарот во Кочани, кои се лекуваат во болницата „Пирогов“.
Во Бугарија вкупно се наоѓаат 14 пациенти, од кои девет се во болницата „Пирогов“, сите се екстубирани и оперирани, кај некои е извршена трансплантација на кожа. Една пациентка се лекува амбулантски со преврски.
Пациентите имаат психолошка поддршка и кај сите се продолжува со третман на изгорениците.
Тројца пациенти се хоспитализирани во Военомедицинскиот центар во Варна во добра општа состојба и во болницата „Св Ѓорѓи“ во Пловдив е хоспитализиран еден пациент.
Сиљановска-Давкова денеска и утре престојува во работна посета на Бугарија, каде што ќе учествува на состанокот на шефови на држави и влади на „Акаба Процес Балкан III“ во Софија.
Посетата се реализира на покана на претседателот на Република Бугарија, Румен Радев и кралот на Хашемитското Кралство Јордан, Абдула Втори.
Македонската претседателка ќе говори на првата сесија од состанокот насловена „Идентификување и разбирање на заканите“.
За време на посетата, предвидени се и билатерални средби на претседателката Сиљановска-Давкова со шефот на бугарската држава Румен Радев и со кралот на Хашемитското Кралство Јордан, Абдула Втори.
TV21
