Денес дојдовме тука да побараме да донесете одлука минималната плата да не биде помала од 500 евра и сите други плати да се зголемат за 100 евра.
Протестот започна напладне пред Работнички дом, каде што членовите на раководството на ССМ ја отворија јавната седница на улица. Потоа се упатија кон законодавниот дом каде што пратија порака до пратениците да донесат одлука за зголемување на минималната плата на 500 евра, а потоа кон Стопанската комора, па до Владата.
Во својот говор пред присутните лидерот на ССМ, Слободан Трендафилов, рече дека неодамнешното зголемување на платите на државните функционери за 79 отсто, вклучително и за пратениците, не е заслужено.
Тој на јавната седница одржана пред Собранието рече дека органите на ССМ, градските синдикати и поборниците за работнички права едногласно донеле одлука пратениците да ги намалат платите на минималец сѐ додека минималната плата за работниците во земјава не се зголеми според нивните барања.
„Денес дојдовме тука да побараме да донесете одлука минималната плата да не биде помала од 500 евра и сите други плати да се зголемат за 100 евра. Денес дојдовме тука ние што одлучуваме во синдикатите бидејќи платите се мизерни“, рече Трендафилов.
Јавната седница ја продолжија пред Стопанската комора и Владата од каде што порачаа дека не може да се донесуваат одлуки за работниците без учество на работниците во одлуките. Според нив, Владата треба да ја укине „незаконската одлука“ за утврдување минимална плата и да воспостави нова методологија за утврдување на платите во интерес на работниците.
Владата одлучи минималната плата да се зголеми за 1.800 денари и да изнесува 24.379 денари. Претходно синдикатите излегоа со предлог минималната плата да се утврди во согласност со законот за зголемување, според нив, за дополнителни 6.000 денари.
Претходно министерот за економија и труд Бесар Дурмиши изјави дека одлуката за зголемување на минималната плата за 1.800 денари е донесена во согласност со законот.
AA
