Предметот на „балансерот“, кој беше инициран од стариот состав на Државната комисија за спречување на корупцијата (ДКСК), ќе се разгледува утре на седницата на Уставниот суд.
Оспорени се следните законски одредби: член 19 став 1 алинеја 1 од Законот за вработените во јавниот сектор, член 36 став 1 алинеја 1 од Законот за административни службеници, како и член 2 став 1 алинеја 8 и член 3 алинеја 1 од Правилникот за задолжителните елементи на јавниот оглас за пополнување на работно место во јавниот сектор, кој се однесува на „припадност на заедница“. Според Уставниот суд, овие одредби ги оспоруваат елементите на правото на слободно изразување на националната припадност и правичната застапеност на сите заедници во органите на државната власт и јавните институции, што е загарантирано со член 9, 32 став 1 и 2, и 54 став 1, 2 и 3 од Уставот.
Подносителот на иницијативата, ДКСК, смета дека обврската кандидатите за административни службеници да наведат припадност на заедница при пријавување за работа ја нарушува уставно загарантираното право на слободно изразување на националната припадност. Според ДКСК, припадноста е лично чувство и може да биде променливо, а не претставува услов за вработување согласно Законот за вработените во јавниот сектор или Законот за административни службеници. Оваа обврска се смета за елиминирачки предуслов за учество во јавен оглас, што го нарушува начелото на стручност и компетентност.
ДКСК исто така укажува дека со оспорената одредба од Правилникот се ограничува правото на пријавување на јавен оглас за кандидати кои не припаѓаат на заедницата наведена во огласот, што ги повредува уставно загарантираните права на работа и слободен избор на вработување. Наведувањето на припадноста на заедницата ограничува достапноста на работните места за кандидатите.
Антикорупциската комисија, на седницата одржана на 11 јануари годинава, одлучи да поднесе иницијатива до Уставниот суд за преглед на „балансерот“, сметајќи дека оваа алатка довела до злоупотреби при вработувањата. ДКСК укажува на евидентниот пораст на бројот на вработени без реални потреби и просторни услови во институциите, како и на практиката каде што кандидатите ја наведуваат етничката припадност за да се вработат.
Според ДКСК, примена на „балансерот“ како основен критериум за распределба на работни места е во спротивност со мерит-системот и води кон злоупотреби, вклучувајќи трговија со влијанија, коруптивно однесување и создавање политички клиенти. Антикорупциската комисија смета дека е неопходно да се испита дали „балансерот“ треба да се укине или да се најдат начини за спречување на неговата злоупотреба.
TV21
