Претседавачот на Советот на министри на Босна и Херцеговина, Борјана Кришто денеска испрати писмо до претставниците на Европската унија во врска со Изборниот закон, а во контекст на европскиот пат на Босна и Херцеговина.
Писмото е упатено до претседателката на Европската комисија Урсула фон дер Лајен, претседателот на Европскиот совет, Шарл Мишел, претседателката на Европскиот парламент Роберта Мецола, високиот претставник за надворешна политика и безбедност на ЕУ, Жозеп Борел и комесарот за соседство и проширување на Европската комисија, Оливер Вархеји.
„Претседавачот Кришто потсети на неодамнешното отворање на преговорите и рече дека на сите во Босна и Херцеговина им е јасно дека целата изборна реформа е од посебно значење за БиХ. Таа посочи дека на БиХкако идна земја-членка на ЕУ ѝ е потребен изборен закон кој нема да биде производ на наметнување или прегласување“, соопшти Советот на министри на Босна и Херцеговина.
Високиот претставник во Босна и Херцеговина Кристијан Шмит во вторникот објави дека наметнал технички измени во Изборниот закон во Босна и Херцеговина поврзани со интегритетот на изборниот процес.
Техничките промени подразбираат дека Централната изборна комисија на Босна и Херцеговина (ЦИК) назначува претседатели на избирачките одбори, воведување скенери, идентификација на гласачите и видео надзор.
Во соопштението на Советот на министри потсетуваат дека особено се води сметка за усогласување на Измените на Изборниот закон.
На 21 март 2024 година, надлежното Министерство за правда го достави предлог-законот во процедура. Истиот во моментов е во јавна дискусија, на која секој во Босна и Херцеговина може да даде свои коментари и амандмани.
Кришто рече дека наметнувањето на опсежен меѓународен надзор на дури 114 поправки е некомпатибилно со европската иднина на БиХ и е најпогубно за независна и суверена Босна и Херцеговина, имајќи предвид дека тоа е закон на кој почива демократскиот систем, а кој по Уставот на БиХ е најважниот правен акт.
„Цврсто верувам дека наметнувањето одлука за измени на изборниот закон на БиХ, за мене, како претседавач на Советот на министри на БиХ, претставува неочекуван предизвик на кој заедно со вас ќе треба да одговориме во начин кој не го загрозува нашиот пат кон ЕУ, како и работата на институциите во Босна и Херцеговина, затоа што институциите во БиХ мора да преземат одговорност за носење на сите одлуки“, наведе Кришто во писмото до високите претставници на ЕУ.
Кришто додаде дека е неопходно „да продолжи соработката и заедничката работа и да се зајакне довербата и почитта меѓу нас во Босна и Херцеговина и да се поддржат решенијата што ќе бидат резултат на работата на институциите на Босна и Херцеговина“.
Таа изрази уверување дека тоа е единствениот начин да се направи неопходниот чекор напред за сите во Босна и Херцеговина, вклучително и европскиот пат.
