Претседателот на Собранието на Србија Ивица Дачиќ најави дека денеска ќе биде распуштен парламентот и ќе бидат распишани предвремени парламентарни избори. Тие, како што е најавено, треба да се одржат на 3 април. Локалните и претседателските избори ги распишува претседателот на Собранието, додека претседателот на Републиката, како што рече Дачиќ, ќе распише предвремени парламентарни избори, по образложението на Владата на Србија да ги распише овие избори. Дачиќ истакна дека овој собраниски состав од 3 август 2020 година бил успешен.
Во меѓувреме, српската влада го усвои предлогот претседателот Александар Вучиќ да го распушти парламентот. Како што беше најавено по седницата на Владата, доколку предлогот биде усвоен и парламентот се распушти, Владата ќе влезе во техничкиот мандат. „Владата на Србија ќе продолжи да работи посветено во интерес на сите граѓани. Владата ќе продолжи да ги извршува сите свои активности во техничкиот мандат со полн капацитет, во согласност со уставните и законските прописи“, се вели во соопштението.
