Хрватското здружение на болнички лекари изрази загриженост дека болниците во земјата би можеле да бидат преполни со пациенти тешко болни од Ковид-19, јави ДПА.
Хрватскиот здравствен систем „повеќе не постои“, се вели во синоќешното соопштение на здружението.„Системот не постои кога ви требаат врски за да добиете кревет каде има и кислородна поддршка“.
Во исто време, здружението ја критикуваше владата. Додека „пациентите со Ковид чекаат со часови во болница бидејќи нема слободни места“, високи владини претставници се однесуваат кон проблемот „како арогантни нарцисоидни тинејџери“.
Во хрватските болници во моментов се лекуваат 1.418 пациенти со коронавирус, од кои 170 се на кислородна поддршка. Бројот на случаи во последните седум дена достигна 587,9 на 100.000 луѓе вчера. Вкупно 52,6 отсто од населението во таа држава се вакцинирани. Драматично зголемување на бројот на новозаразени лица вчера е регистрирано и во Чешка, Полска и Словачка.
