Шумската полиција добива нови човечки ресурси во пресрет на грејната сезона, кога се очекува зголемен притисок врз шумското богатство во земјава.
На свеченост во Министерството за земјоделство, шумарство и водостопанство денеска беа доделени уверенија за успешно завршена шестмесечна обука на 81 шумски полицаец и еден заменик-командир.
Министерот Борче Серафимовски истакна дека со новите кадри ќе се зголемат капацитетите на Шумската полиција за спроведување теренски контроли, спречување на бесправната сеча и откривање незаконски транспорт и продажба на огревно дрво.
Серафимовски им порача на новите припадници на Шумската полиција да постапуваат професионално, одговорно и во согласност со законските овластувања.
– Законот треба да важи подеднакво за секого, без оглед на името или функцијата. Држете се до фактите и постапувајте во рамките на своите законски овластувања. Ја имате целосната моја поддршка во борбата против криминалот со нашето шумско богатство – порача министерот.
Со кадровското зајакнување на Шумската полиција се очекува поефикасна борба против шумскиот криминал и поголема заштита на природните ресурси.


