Medin Nuredini 
Обилните врнежи од дожд предизвикаа големи поплави во Истанбул. Четиринаесетгодишно момче го загуби животот од струен удар за време на поплавите.
Момчето, идентификувано со иницијалите М. И., починало откако стапнало во локва во паркот Чукурбостан, во населбата Балат, во истанбулската општина Фатих. Според информациите од кабинетот на гувернерот на Истанбул, малолетникот бил пренесен во болница во бессознание, но починал и покрај напорите на лекарите, објавија турските медиуми.
Во градот со околу 16 милиони жители биле пријавени повеќе од 1.200 случаи на поплави, 15 лизгања на земјиштето и десетици случаи во кои луѓе останале заробени од надојдената вода.
Повеќе од 2.500 пријави поради лошите временски услови
Обилните врнежи предизвикаа хаос низ целиот град, а службите за итни случаи примиле вкупно 2.518 пријави поврзани со лошите временски услови.
Според податоците, невремето погодило 808 станбени објекти, 280 деловни простории и 76 возила.
Медиумите известуваа за поплавени куќи, продавници, улици и подвозници, додека многу возила останале заглавени во водата.
Најобилни врнежи во азискиот дел на градот
Најинтензивни врнежи биле регистрирани во областа Омерли, во општината Бејкоз, во азискиот дел на Истанбул.
Поради сериозноста на ситуацијата, во близина на Регионалната дирекција на Турската агенција за управување со катастрофи и вонредни состојби (АФАД) бил формиран кризен координативен центар.
На терен биле ангажирани околу 8.000 припадници на различни служби, со поддршка од 2.000 возила и градежни машини. Во интервенциите учествувале екипи на АФАД, Метрополитенската општина Истанбул и комуналните служби.
Наставата е прекината, забрането е движењето на мотоциклите
Поради временските услови, властите одлучиле во четврток да ја прекинат наставата во училиштата во Истанбул. Исто така, било забрането движењето на мотоциклите поради опасностите на патиштата.
Гувернерот на Истанбул, Давут Ѓул, ги повикал жителите да бидат особено внимателни, особено во азискиот дел на градот, и им препорачал да останат дома, освен ако патувањето не е неопходно.
Вработените со попреченост во јавниот сектор, како и мајките со мали деца, биле ослободени од работните обврски. Исклучок биле вработените во социјалните служби кои работат во установи за сместување деца, стари лица и лица со попреченост, со цел да се обезбеди континуитет на грижата и поддршката за овие лица.
На жителите што живеат во станови на приземје или во подруми им било препорачано ноќта да ја поминат на побезбедни места.
Невремето предизвикало и сериозен сообраќаен метеж, особено за време на вечерниот шпиц, кога граѓаните се враќале од работа. Јавниот превоз бил исклучително преоптоварен, бидејќи многу граѓани се откажале од користењето приватни автомобили.
И покрај големите проблеми на патиштата, кабинетот на гувернерот соопштил дека ниту еден пат не бил целосно затворен поради дождот. Аеродромските писти функционирале нормално, а не биле пријавени откажувања на летови.
