Medin Nuredini 
Откако по полноќ се урна дел од пешачката патека на мостот преку реката Сава меѓу Градишка и Стара Градишка, надлежните служби го затворија мостот и го прекинаа сообраќајот, поради што привремено е затворен и граничниот премин Градишка, еден од најфреквентните премини меѓу Босна и Херцеговина и Хрватска, јавува Анадолу.
Министерството за комуникации и транспорт на Босна и Херцеговина е во постојана комуникација со надлежните институции во Босна и Херцеговина, како и во Република Хрватска, со цел утврдување на состојбата на мостот и преземање неопходни мерки.
„Според моментно достапните информации, уривањето се случило рано утрово, по што надлежните полициски служби го прекинаа сообраќајот преку мостот, како и на пристапните патишта до Градишка, со што привремено е прекинато работењето на граничниот премин Градишка“, соопшти Министерството за комуникации и транспорт на Босна и Херцеговина.
На местото се упатени стручни екипи од „Патишта на Република Српска“ и „Хрватски патишта“, со цел да извршат детален преглед на состојбата на мостот и процена на безбедноста за негова натамошна употреба. Повеќе информации за степенот на оштетување и евентуалните мерки за санација ќе бидат познати по завршувањето на стручниот преглед.
Министерството за комуникации и транспорт на Босна и Херцеговина, заедно со Министерството за море, транспорт и инфраструктура на Република Хрватска, е надлежно за спроведување на Договорот за одржување на меѓудржавните мостови на границата меѓу БиХ и Хрватска, при што финансирањето на одржувањето и реконструкцијата се врши по принципот 50:50, додека работите поврзани со одржувањето на мостовите се вршат преку надлежните управители/тела за патна инфраструктура, односно ЈП „Патишта на РС“ во конкретниот случај од страна на БиХ и „Хрватски патишта“ од страна на Хрватска.
Мостот е изграден во 1956 година. Вкупната должина на мостот изнесува 240 метри.
Со оглед на важноста на овој граничен премин за меѓународниот патнички и товарен сообраќај, ќе се одржи вонредна седница на Советот на министри на Босна и Херцеговина, на која ќе се разгледуваат информациите од надлежните институции, состојбата на мостот, како и итните активности со цел што поскоро воспоставување на безбедно одвивање на сообраќајот.
