Medin Nuredini 
Пратеникот на СДСМ и поранешен министер за земјоделство, Љупчо Николовски, е повикан во полициска станица на распит. Според Министерството за внатрешни работи, Николовски бил испрашуван од инспектор од Одделот за економски криминал и корупција.
„Активностите се во тек, по што соодветно ќе ја информираме јавноста“, соопшти Министерството за внатрешни работи, без да даде дополнителни детали.
Преку објава на својот Фејсбук профил, реагираше и Николовски, опишувајќи ја дотичната истрага како случај измислен од владата, како што вели, со цел да ги прикрие скандалите на актуелното раководство.
„Не станува збор за прекршување на Законот за јавни набавки, ниту за пријава од земјоделци. Станува збор за монтиран случај кој треба да го оттргне вниманието од вистинските прашања.
Криминалот не се покрива со монтирани случаи. Неспособноста не се крие со напади врз туѓите успеси.
На земјоделците, винарите и производителите кои ме контактираа овие денови, Ви благодарам. Вие знаете што направивме. Вие живеете од таа реформа“, напиша Николовски.
