Medin Nuredini 
Независниот синдикат за одбрана бара зголемување на основната плата за 20%. Претседателот на синдикатот, Марио Јуришиќ изјави дека во последните две години платата на воениот персонал и вработените во одбраната воопшто не е зголемена. Тој побара ревидирање и изнаоѓање решение за статусот на професионалните војници до пензионирање.
„Доколку ги пресметаме платите на вработените во одбраната, на сите нивоа – професионален војник, цивилен, подофицер и офицер – ќе видиме дека платите се исти и во февруари 2024 година, како и во декември со последната плата за 2025 година. Поради тоа бараме овој систем да се преиспита, бидејќи нашите припадници со таа плата не можат да ги купат истите работи што ги купувале во февруари 2024 година и да ги купуваат истите во 2025 година“, вели Марио Јуришиќ, претседател на Независниот синдикат за одбрана.
Јуришиќ информираше дека за нивните барања се сретнале и со министерот за одбрана, но им било соопштено дека не се планирани зголемувања на платите.
Со реакција излезе Министерството за одбрана, од каде нагласуваат дека секое синдикално барање треба да се разгледува преку дијалог и дека постојано се работи на подобрување на условите за работа на припадниците на Армијата и нејзините вработени. Според нив, за првпат редовно се исплаќаат сите надоместоци согласно Колективниот договор, вклучувајќи кирија, исхрана, превоз и додатоци за прекувремена работа, ноќна работа и ангажмански задачи, кои се додаваат на основната плата.
Просечната плата на професионален војник изнесува околу 35.700 денари, а на еден полковник 70.200 денари, соопштуваат од Министерството, додавајќи дека другите додатоци значително ја менуваат вкупната сума во однос на она што беше изнесено на денешната прес-конференција на Синдикатот.
„Би сакале да нагласиме дека поради одлуките кои се донесени од страна на претходната Влада во изминативе неколку години е нанесена огромна штета кон самите припадници, а со тоа и по буџетите за одбрана за минатата и предминатата година, за што само во овие година и половина се исплатени огромни суми по основ на судски и извршни пресуди. Како за илустрација, минатата 2025 година во два наврати во мај и во декември 2025 година се исплатени 107.000.000 денари по основ на неисплатени финансиски средства за 2019, 2020 и 2021 година за прекувремени часови за припадниците на Армијата“, велат од Министерство за одбрана.
Од Министерството за одбрана исто така информираат дека припадниците кои ќе наполнат 45 години можат да изберат меѓу надомест во висина од две просечни плати за секоја година стаж или да продолжат да работат како цивилни лица во Армијата или во други институции, додека се разгледуваат и можности за задржување на одредени војници по 45-годишна возраст во специфични служби. Според соопштението, оваа иницијатива ќе се подготвува во координација со синдикатите со цел да се обезбеди најдоброто решение.
TV21
