Просечната плата во земјава порасна на 45.943 денари, раст од 9 отсто на годишно ниво

Просечната нето-плата во Македонија продолжува да расте и во октомври 2025 година изнесува 45.943 денари, што претставува зголемување од 9 проценти во споредба со истиот месец лани, покажуваат најновите податоци на Државниот завод за статистика.

Најизразен пораст на платите е регистриран во секторот здравствена и социјална заштита, каде што просечната месечна нето-плата е зголемена за 13,3 проценти. Веднаш зад него се административните и помошни услужни дејности со раст од 13,2 проценти, како и дејностите поврзани со недвижен имот, каде платите се зголемени за 10,9 проценти на годишно ниво.

Од ДЗС посочуваат дека зголемување на просечната нето-плата е забележано и во однос на претходниот месец. Најголем месечен раст има во дејностите поврзани со недвижен имот од 9,5 проценти, следуваат информациите и комуникациите со 4,2 проценти и административните и помошни услужни дејности со 3,6 проценти.

Според статистиката, растот на платите во овие сектори има најголемо влијание врз вкупното зголемување на просечната месечна нето-плата на национално ниво.