Medin Nuredini 
Македонците кои живеат во странство минатата година испратиле во земјава 310 милиони евра, што претставува околу 2 проценти од БДП. Иако Македонија остварува суфицит, во апсолутни бројки личните дотации од странство бележат пад во последните години – 319 милиони евра во 2023 и 331 милион евра во 2022 година.
Од земјите во регионот, најголеми дотации лани испратила дијаспората на Србија, со 4,47 милијарди евра, потоа следуваат Босна и Херцеговина со 1,99 милијарди, Косово со 1,32 милијарди, Албанија со 1,28 милијарди и Црна Гора со 345 милиони евра.
Според податоците на Евростат, во 2024 година девет земји членки на ЕУ оствариле суфицит кај личните трансфери, меѓу кои Хрватска (2,6% од БДП), Бугарија (1,3%) и Португалија (1,2%). На спротивната страна, најголеми дефицити забележале Малта (-2,8%), Кипар (-0,9%), Белгија (-0,6%), како и Грција, Шпанија и Франција (по -0,5% од БДП).
Личните трансфери испратени од жители на ЕУ кон лица кои не се жители на Унијата лани изнесуваат 52,1 милијарди евра, што е зголемување од 6% во споредба со 2023 година, кога изнесувале 49,2 милијарди евра. Прилевот на лични трансфери кон домаќинствата во ЕУ достигнал 14,8 милијарди евра, што е зголемување од 7% на годишно ниво.
Во последните пет години е забележан значителен раст на одливот на лични трансфери, кој се зголемил за 51%, додека приливот расне побавно, за 26%. Како резултат на тоа, негативното салдо на ЕУ во однос на земјите кои не се членки на Унијата се проширило и во 2024 година достигнало 37,3 милијарди евра.
