Medin Nuredini 
Министерството за надворешни работи на Турција објави дека во тек е непрекинат контакт и координација со властите во Подгорица по случувањата во Црна Гора и дека се преземаат потребните мерки за да се обезбеди сигурноста на турските граѓани.
Турското МНР издаде писмено соопштение во врска со случувањата во Црна Гора.
Во соопштението, во кое се наведува дека во Црна Гора во текот на викендот се случиле некои тажни настани од кои се погодени и турските граѓани, се вели:
„Веднаш по почетокот на настаните беше воспоставен контакт со црногорските власти и беа преземени потребните мерки за да се осигури безбедноста на нашите граѓани“.
Во соопштението се наведува дека внимателно се следат сите аспекти на случувањата и дека контактот и координацијата со црногорските власти продолжуваат без прекин.
– Министерот Фидан оствари телефонски разговор со премиерот на Црна Гора и министерот за надворешни работи
Според информациите добиени од извори во турското МНР, министерот за надворешни работи, Хакан Фидан, остварил телефонски разговор со црногорскиот премиер Милојко Спајиќ и црногорскиот вицепремиер и министер за надворешни работи, Ервин Ибрахимовиќ.
За време на разговорите, министерот Фидан ги пренел своите очекувања дека ќе бидат преземени потребните мерки за заштита на безбедноста и правата на турските граѓани. Црногорската страна дала гаранции по ова прашање.
Откако во црногорските медиуми се појавија наводи за напад со нож во градот Подгорица во кој биле вмешани турски државјани, црногорскиот премиер Милојко Спајиќ во објава на платформата на социјалните медиуми на американската компанија X напиша дека привремено е суспендирано безвизното патување за турските граѓани.
