Medin Nuredini 
Турските алевитски и бекташки заедници во Западна Тракија реагираа на обидите во Албанија за создавање државна структура врз основа на бекташката вера.
Претседателот на Здружението за образование и култура на малцинствата „Сечек“, Нџеметин Каја, на состанок одржан во Комотини, прочита изјава во која нагласи дека оваа формација е спротивна на верските принципи и е неприфатлива.
Во изјавата се осврна кон изјавите од последните месеци на албанскиот премиер Еди Рама за „создавање бекташка држава во Тирана под водство на Баба Монди (Едмонд Брахимај)“. Се потенцираше дека оваа иницијатива е непогодна не само од верски аспект, туку и за регионалниот мир и мултикултурните структури.
Нагласувајќи дека во бекташката традиција нема место за политички структури, во изјавата се вели дека самопрогласувањето на Баба Монди за „светски лидер на бекташите“ е спротивно на обредите и историската практика.
„По смртта на Хаџи Деде Решат Барди, во Албанија не е спроведена ниту церемонијата за декретирање на ‘халифебаба’. Во овој случај, и ‘дедебабалекот’ е неважечки“, стои во реакцијата.
Исто така, беше потсетено дека центарот на бекташизмот се наоѓа во рамките на границите на Турција, во Текијата на Хаџи Бекташ Вели, и дека „хиерархиската структура создавана со векови продолжува без прекин и денес“. Поради оваа причина, тврдењето на Баба Монди за лидерство и државно формирање е неприфатливо, се вели во изјавата.
Исто така, беше нагласено дека алевитско-бекташките заедници во Албанија, Северна Македонија, Босна и Херцеговина, Бугарија, Грција и Турција, како и на Балканот воопшто, меѓусебно имаат само духовна и емотивна врска.
