Во Собранието утре ќе започне расправата за Дополнетиот предлог на буџетот за 2025 година, како дел од дневниот ред на 22-рата седница. Амандманската расправа заврши на 29 ноември, а прифатените амандмани се вклучени во дополнетиот текст.
Претресот по буџетот ќе трае најмногу пет дена, со ограничено време за говорење: пратениците до 20 минути, координаторите на пратеничките групи до 30 минути, а представниците на Владата исто така до 30 минути.
Буџетот предвидува економски раст од 3,7% и вкупни приходи од 358,8 милијарди денари, додека расходите се планирани на 400,2 милијарди денари, што дава дефицит од 41,35 милијарди денари или 4% од БДП. Инфлацијата се очекува да се намали на 2,2%, а растот на извозот да биде 4,2%, додека увозот ќе порасне за 4,4%.
За капитални инвестиции се планирани 50,5 милијарди денари, а за тековни расходи 349,6 милијарди денари. Од овие, 48,1 милијарда денари се за плати, а 105,5 милијарди денари за пензии, вклучувајќи зголемување за 2.500 денари од март 2025. За здравство се предвидени 52,5 милијарди денари, што е за 10,7% повеќе од претходната година. Поддршката за земјоделството изнесува 8 милијарди денари, а за локалните самоуправи 33,2 милијарди денари.
Премиерот Христијан Мицкоски најави дека економијата се стабилизирала, со раст на БДП од 3% во третиот квартал, а се очекува сличен или поголем раст и во четвртиот квартал. Според него, странските инвестиции до крајот на годината ќе надминат 1 милијарда евра.
На истата седница ќе се разгледува и Предлог-законот за извршување на Буџетот за 2025 година.
TV21
