![](https://timebalkan.mk/wp-content/uploads/2024/05/grcija-plaza-681x451-1.jpg)
Минатата година Грција ја посетиле 1.128.000 туристи од Северна Македонија, бројка што е нешто помалку од двојно поголема споредбено со 2022 година, согласно податоците од Институтот на Асоцијацијата на грчки туристички бизниси (ИНСЕТЕ), јави дописничката на МИА од Атина.
Во истражувањето „Кој каде оди? Колку долго останува? Колку троши?“, ИНСЕТЕ ги анализира официјалните податоци на Банката на Грција за туризмот и туристите во земјата во 2023 година, а поконкретно се фокусира на секој од 13-те грчки региони.
Северна Македонија и овој пат е меѓу првите 15 држави според бројот на туристи и останува без промени на 11-та позиција, иако драстично е зголемен бројот на посетители од нашата земја.
![туристи мк гр](https://mia.mk/articles/images/%D0%B2%D0%BE2023%D0%B3%D0%BE%D0%B4%D0%B8%D0%BD%D0%B0%D0%B3%D1%80%D1%86%D0%B8%D1%98%D0%B0%D1%98%D0%B0%D0%BF%D0%BE%D1%81%D0%B5%D1%82%D0%B8%D0%BB%D0%B5%D0%BD%D0%B0%D0%B4%D0%B5%D0%B4%D0%B5%D0%BD%D0%BC%D0%B8%D0%BB%D0%B8%D0%BE%D0%BD%D1%82%D1%83%D1%80%D0%B8%D1%81%D1%82%D0%B8%D0%BE%D0%B4%D1%81%D0%B5%D0%B2%D0%B5%D1%80%D0%BD%D0%B0%D0%BCXQ23B/spnaBQovm/large.webp?use_watermark=1)
Првите 15 земји со најголем број посети и посетители на Грција се Германија, Велика Британија, Бугарија, Италија, Франција, САД, Романија, Холандија, Полска, Албанија, Северна Македонија, Турција, Австрија, Белгија и Србија.
Конкретно за Северна Македонија, минатата година, за 46,5 отсто се зголемил бројот на посетители споредбено со една година претходно, односно имало 1.128.000 посетители во 2023 година, наспроти 770.000 во 2022 година.
Во однос на посетите од нашата земја, во 2023 имало 1.132.000 посети, а пред две години 771.000, додека пак мнозинството посети се во северниот дел на Грција.
Во однос на перифериите, што е и предмет на анализата, најпосетена е областа Атика, поширокиот регион на Атина, потоа се островите во јужниот дел на Егејското море, а на третата позиција е централниот дел од северна Грција – регионот во кој спаѓаат Солун и Халкидики, каде што посетителите од Северна Македонија се меѓу првите три земји.
![туристи мк гр](https://mia.mk/articles/images/%D0%B2%D0%BE2023%D0%B3%D0%BE%D0%B4%D0%B8%D0%BD%D0%B0%D0%B3%D1%80%D1%86%D0%B8%D1%98%D0%B0%D1%98%D0%B0%D0%BF%D0%BE%D1%81%D0%B5%D1%82%D0%B8%D0%BB%D0%B5%D0%BD%D0%B0%D0%B4%D0%B5%D0%B4%D0%B5%D0%BD%D0%BC%D0%B8%D0%BB%D0%B8%D0%BE%D0%BD%D1%82%D1%83%D1%80%D0%B8%D1%81%D1%82%D0%B8%D0%BE%D0%B4%D1%81%D0%B5%D0%B2%D0%B5%D1%80%D0%BD%D0%B0%D0%BCx82S6/TiuWCEAHG/large.webp?use_watermark=1)
-На трето место е регионот централна Македонија со 6.566.000 посети, а мнозинството посети се од Бугарија (1.821.000). Потоа следат посети Северна Македонија (1.079.000) и од Германија (917.000), пишува во анализата.
Сепак, иако Северна Македонија е меѓу првите три земји по бројот на посети во конкретниот регион, сепак не е во топ трите држави според бројот на ноќевања и според направените трошоци за време на престојот.