Специјалната пратеничка на генералниот секретар на ОН за Мјанмар Ноелин Хајзер се очекува денеска да се сретне со лидерите на воената хунта во услови на зголемен политички хаос и насилство во земјата.
Ситуацијата во оваа југоисточна азиска земја е напната откако на почетокот на минатата година војската ја собори демократски избраната влада, де факто предводена од лауреатката на Нобеловата награда за мир во 1991 година, Аунг Сан Су Ќи, и започна крваво задушување на мирните протести и вооружениот отпор што следеше.
Претставничката на ОН Ноелин Хајзер вчера пристигна во главниот град Најпјида, каде што ја пречекаа претставници на Министерството за надворешни работи. Таа ќе се сретне со лидерот на хунтата Мин Аунг Клајн и министрите, фокусирајќи ги разговорите на „влошената ситуација и краткорочните грижи“, се вели во соопштението на ОН, во кое не се дадени детали.
