Medin Nuredini 
Демократите ја презедоа контролата врз Претставничкиот дом на САД на изборите одржани вчера, откако Џони Гарсија го победи Карлос Де Ла Круз во 35-тиот изборен округ во Тексас, јави „Асошиејтед прес“, пренесува Анадолу.
Со оваа победа, демократите обезбедија 218 места, бројот потребен за мнозинство во Домот што брои 435 пратеници, со што ставија крај на републиканската контрола и му нанесоа сериозен политички удар на претседателот Доналд Трамп. Според податоците од 6:39 часот по Гринич, исходот за 87 места сè уште не беше утврден.
До 6:23 часот по Гринич, Демократската партија успеа да освои 25 места кои претходно беа во рацете на републиканците. Ова вклучува три изборни окрузи во Калифорнија (1-ви, 3-ти и 41-ви), еден во Колорадо (8-ми), три во Ајова (1-ви, 2-ри и 3-ти), еден во Индијана (5-ти), еден во Кентаки (6-ти), еден во Мисури (2-ри), еден во Северна Каролина (11-ти), еден во Небраска (2-ри), еден во Њу Џерси (7-ми), два во Охајо (7-ми и 15-ти), четири во Пенсилванија (1-ви, 7-ми, 8-ми и 10-ти), два во Тексас (15-ти и 23-ти), еден во Јута (1-ви), еден во Вирџинија (2-ри) и два во Висконсин (1-ви и 3-ти изборен округ).
Овој резултат им овозможува на демократите да ги блокираат законските предлози на републиканците и да иницираат истраги против администрацијата на Трамп во текот на преостанатите две години од неговиот претседателски мандат. Покрај тоа, лидерот на демократите во Претставничкиот дом, Хаким Џефрис, е на пат да стане првиот Афроамериканец на функцијата претседавач на Претставничкиот дом.
Републиканците влегоа во изборната трка со тесно мнозинство во Претставничкиот дом, што му помогна на Трамп да реализира голем дел од својата законодавна агенда откако се врати во Белата куќа во јануари 2025 година.
Демократите ја водеа својата кампања фокусирајќи се на порастот на трошоците за живот, имиграциските политики на администрацијата и војната со Иран, обидувајќи се да ја искористат јавната незадоволност од претседателствувањето на Трамп. Новиот Конгрес ќе се состане во јануари 2027 година, кога демократите ќе можат да го изберат претседателот на Претставничкиот дом и да ја преземат контролата врз комисиите на тој дом.
