Михаела Доцова е новата претседателка на бугарскиот парламент

Д-р Михаела Доцова беше избрана за претседателка на бугарскиот парламент со мнозинство од 188 пратеници. Немаше гласови „против“, додека 49 пратеници беа „воздржани“ – од ПП-ДБ и од „Преродба“, јавува БГНЕС, пренесува Трибуна.

За другиот кандидат Петар Петров од „Преродба“ гласаа единствено пратениците од неговата пратеничка група.

„Денес повеќе од кога било Бугарија има потреба не само од стабилно управување, туку и од оздравување на државноста“, изјави Доцова во своето прво обраќање од парламентарната говорница.

Како прва меѓу еднаквите, таа упати повик за враќање кон правната држава и најави дека како претседател ќе го брани достоинството на Народното собрание и квалитетот на законодавниот процес.

Нека 52. Народно собрание биде пример за политички плурализам, дијалог и конструктивност. Искрено верувам дека довербата во демократијата започнува од оваа сала.

Да го обновиме авторитетот на Народното собрание и да ја вратиме довербата дека тука се работи во името на законот и во името на бугарското општество, повика Доцова.

Со среќа на 52. Народно собрание!, заврши новоизбраната претседателка на парламентот.

По своето обраќање, Доцова го зазеде претседателското место во Народното собрание.