Medin Nuredini 
Документи од Службата за општи и заеднички работи при Владата покажуваат како од јуни 2024 до декември 2025 владиниот лирџет бил користен за бројни домашни и меѓународни летови, при што најчеста релација била Скопје–Будимпешта со седум реализирани патувања, пишува Телма.
Според објавеното, министерот за транспорт и врски, Александар Николоски, најчесто го користел авионот – вкупно 11 пати, главно за летови кон Унгарија, но и за Лондон, Прага, Виена, како и Скопје–Истанбул со слетување во Охрид пред враќањето. Еден од летовите кон Будимпешта вклучувал и сервисирање во Нирнберг, што отвора прашања за рационалноста на маршрутите кога трошоците се на товар на јавните средства.
Претседателката Гордана Силјановска-Давкова го користела авионот 13 пати, патувајќи во соседните држави – Тиват, Подгорица и Тирана – како и до Рим, Истанбул и Копенхаген. Претседателот на Собранието, Африм Гаши, бил регистриран како корисник седум пати, при што три летови бил придружуван од сопругата. Неколку летови, како Скопје–Џеда, немаат податоци за патниците, што создава празнина во евиденцијата на јавниот авион.
Премиерот Христијан Мицкоски го употребил авионот три пати: за Будимпешта, Тирана и Сплит, а евидентиран е и лет Скопје–Белград без целосни податоци за патниците. Министерот за надворешни работи, Тимчо Муцунски, користел летови до Ротердам, Белград и Стразбур, а летови со авионот имале и министерката за енергетика Сања Божиновска, министерот за локална самоуправа Златко Перински, министерката за образование Весна Јаневска и поранешниот министер за животна средина Изет Меџити.
Во периодот од средината на 2024 до крајот на 2025, авионот бил користен околу 40 пати, без да се вклучат летовите за сервисирање и два посебни летови организирани од МНР – транспорт на повредени од пожарот во Кочани и евакуација на граѓани од Израел. Авионот бил сервисирал девет пати, а во објавата се наведува и план за набавка на уште еден таков авион.
Сето ова ја отвора темата за транспарентност и јавен надзор, особено кога евиденцијата за патниците не е целосна и нема јасно образложување за секој лет, што поставува прашање дали државата прво ќе ги зацврсти механизмите за отчетност пред да ја проширува својата авионска флота.
TV21
