Лидерот на партијата „Преродба“ во Бугарија, Костадин Костадинов, истакна дека Бугарија треба јавно да излезе со барање за анексија на Северна Македонија и Јужна Бесарабија.
Претседателката на Северна Македонија, Гордана Силјановкса-Давкова, реагираше на коментарите на лидерот на бугарската крајнодесничарска партија „Преродба“, Костадин Костадинов, за анексијата на Северна Македонија, јавува Анадолу.
Поканета на еден телевизиски канал, Силјановкса-Давкова го нарече за непристоен предлогот на бугарскиот политичарот.
„Ова е непристоен предлог. Намерата не е чесна, намерата не е заради почит. Обратно. Намерата вака да се искаже еднострано, всушност значи непочитување, значи непризнавање. Тогаш мојот коментар е дека фрустрации се во прашање“, рече претседателката на Северна Македонија.
„Непристоен предлог е бидејќи во историјата имало моменти кога и такви предлози биле во оптег и се разбира дека тие не биле добредојдени. За да предлагате вие балкански федерации и слични модели треба да негувате и да манифестирате почит кон соседите, елементарна почит“, додаде таа.
„Тоа значи да го признавате другиот, да ја признавате посебноста, да го третирате како рамноправен. Впрочем тоа е суштината на Договорот за ЕУ, на Лисабонскиот договор. во преамбулите е суштината. Во преамбулата на Договорот за пријателство и добрососедство меѓу Македонија и Бугарија пишува дека Бугарија како членка на Европската унија ќе и помага на Македонија на патот кон ЕУ“, изјави Силјановска-Давкова.
Инаку, Костадинов денеска ја повика владата во Софија официјално да ги објави претензиите за анексија на Северна Македонија и украинскиот регион Јужна Бесарабија.
Во објавата на социјалните мрежи, Костадинов изрази поддршка за изјавите на новоизбраниот американски претседател Доналд Трамп за Канада и Панамскиот канал и нагласи дека Бугарија треба јавно да излезе со барање за анексија на Северна Македонија и Јужна Бесарабија.
Партијата „Преродба“ е трета по големина партија во бугарскиот парламент.
На коментарите на Костадинов претходно реагираше и Министерството за надворешни работи и надворешна трговија на Серверна Макледонија, кое ја осуди изјавата и ја повика официјална Софија да ги осуди овие зборови, кои, според министерството, се против принципите на регионалната соработка.
„Ваквите коментари го поткопуваат нашиот суверенитет и добрососедските односи“, се вели во соопштението на Министерството.
AA
