Завршува мерката за ограничување на профитната маржа на 73 основни прехранбени производи, што Владата ја воведе во септември. На овие производи, бруто профитната маржа беше ограничена на 10% во трговијата.
Владата најавува силен отпор на нови зголемувања на цените. Премиерот Христијан Мицкоски изрази уверување дека ќе ги искористат сите можности за заштита на стандардот на граѓаните. Според него, ако дојде до зголемување, ќе се реагира со ригорозни мерки.
Министерот за економија Бесар Дурмиши истакна дека мерката донела резултати, со намалување на цените за 5-10%. Тој е оптимист дека трговците нема да ги зголемат цените благодарение на новиот Закон за нефер трговски практики.
Сојузот на синдикати на Македонија, сепак, смета дека мерката не донела посакувани резултати и предупредува на алчноста на трговците, кои ги зголемиле цените пред воведувањето на мерката. Според нив, потребите на четиричлено семејство во октомври достигнале 61.249 денари, при што само за храна и пијалоци се потребни 22.069 денари.
Од Владата се најавуваат и нови потрошувачки кошници со ограничено времетраење.
TV21
