Бугарија, Романија и Хрватска беа подложени на темелна проверка, која покажа дека тие целосно ги исполнуваат сите услови за да бидат примени во Шенген зоната. Ова го изјави еврокомесарката за внатрешни работи Илва Јохансон.
Еврокомесарот за европски начин на живот и потпретседател на ЕК Маргаритис Схинас коментира дека е мит дека Шенген значи помала контрола. Според него, проширувањето на Шенген зоната ќе доведе до поголема и подобра контрола на надворешните граници на ЕУ.
Илва Јохансон рече дека дополнителните проверки што ги побарале некои земји покажале дека Бугарија и Романија дополнително ја зголемиле заштитата на надворешните граници. Според неа, Европската комисија нема информации дека границата меѓу Бугарија и Турција може да се мине за 50 евра. Холандскиот премиер Марк Руте во петокот рече дека неговата земја сака да го спречи тоа да се случува.
Јохансон рече дека министрите за внатрешни работи ги имаат сите извештаи, кои покажуваат дека Бугарија, Романија и Хрватска целосно ги исполнуваат сите барања. На 8 декември, кога се гласа, таа очекува позитивен резултат за сите три земји.
