Medin Nuredini 
Граничниот премин Бахчекој (Кипи) меѓу Грција и Турција доцна синоќа беше затворен за камиони и други тешки возила поради протест на земјоделците во Грција.
Според информациите од терен, грчката страна го затворила преминот Кипи за товарни возила како дел од протестите што ги организираат земјоделците. Од Царинската служба за Анадолу изјавија дека преминот останува отворен за приватни автомобили и дека преговорите меѓу земјоделците и властите сè уште траат.
Во рамки на пошироките протести што се одржуваат низ целата земја, грчките земјоделци повремено ги блокираат меѓуградските автопати, барајќи поддршка од Владата.
Во неделата, демонстрантите се судрија со полицијата во близина на централниот град Лариса, што дополнително ја зголеми тензијата околу нивните барања.
Грчките земјоделци најавија дека ќе ја засилат протестната кампања поради растечките трошоци за производство, доцнењето во исплатите на компензациите и проблемите со државната агенција за земјоделски плаќања ОПЕКЕПЕ.
Во јуни, Европската комисија ја казни Грција со 392,2 милиони евра поради голема измама со земјоделските субвенции, која датира од 2016 година.
Казната произлезе од сериозни пропусти и недостатоци во надзорот од страна на ОПЕКЕПЕ, агенција што беше укината во мај по откривање на злоупотребите, вклучувајќи фиктивни пасишта и измамнички земјоделски активности, за кои неправилно биле доделувани средства.
