Македонија и Унгарија со засилена воена соработка

Унапредување на билатералната воена соработка, размена на искуства во доменот на специјалните сили, како и трансформацијата и модернизацијата на Армијата беа во фокусот на средбата меѓу началникот на Генералштабот на Армијата на Македонија, генерал-мајор Сашко Лафчиски, и неговиот унгарски колега, генерал Габор Беренди, кој е во официјална посета на државата.

Генералот Беренди, кој ја предводи унгарската делегација, беше информиран за тековните активности и капацитетите на Армијата на Македонија, а му беше понудена и можноста унгарските сили да користат дел од обуките на армискиот полигон „Криволак“.

Во рамки на посетата, на охридската плажа „Бафало Бич“ беше реализирана заедничка вежба под наслов „Препад на пловен објект и командно место“, во која учествуваа припадници на специјалните сили на двете армии. Вежбата е дел од поширока програма на обука што се спроведува веќе две недели во Охрид и опфаќа специјализирана нуркачка подготовка.

„Целта е не само да го зајакнеме партнерството туку и да ја унапредиме оперативната интероперабилност на нашите сили. Оваа соработка претставува пример за тоа како сојузничките армии во НАТО можат да работат заедно“, изјави Лафчиски.

Во текот на посетата беа презентирани и плановите за понатамошна модернизација и трансформација на Армијата. Како што појасни Лафчиски, првата фаза од трансформацијата на лесната пешадиска батаљонска група е завршена, а во тек е втората фаза – опремување и преструктуирање на останатите маневарски батаљони.

Договорено е македонски припадници од специјалните сили, особено нуркачи, да учествуваат на специјализирани курсеви во Унгарија, наменети за инструктори за нуркање, што претставува нов чекор во професионалното усовршување.

Началникот на Генералштабот ја оцени борбената готовност на Армијата како висока и најави натамошно зголемување на персоналот, опремата и буџетските средства во следниот период.

TV21