Германската министерка за Европа и климатски прашања, Ана Луерман, во Сараево потврди дека Германија и Австрија воведоа забрана за влез на раководството на босанскиот ентитет Република Српска, вклучително и претседателот Милорад Додик, како и дека инфраструктурните проекти што беа планирани за Република Српска се замрзнати.
Во интервју за Јавниот сервис на Босна и Херцеговина (БХРТ), министерката изјави дека властите на РС водат политика што оди во сецесионистичка насока, што е директно спротивна на европските вредности.
Претходно, германската амбасада во Босна и Херцеговина соопшти дека Австрија и Германија одлучиле да преземат мерки против лидерите на Република Српска. Ова беше соопштено по средбата на министерката за надворешни работи на Австрија Беате Мајнл Рајзингер и германскиот министер Луерман во Сараево.
„Нападите на водечките политичари на Република Српска врз уставниот интегритет на Босна и Херцеговина, кои треба намерно да ја ослабат целата држава, се неприфатливи и претставуваат опасност за безбедноста и стабилноста на БиХ и на целиот регион, и го блокираат натамошниот процес на приближување со Европската унија и ја ставаат под прашање. Поради оваа причина, Австрија и Германија во договор со своите европски партнери иницираа мерки со кои ќе спречат влез на тројца одговорни политичари од Република Српска во Австрија и Германија“, беше соопштено по средбата на двајцата претставници со претседателката на Советот на министри на БиХ, Борјана Кристо во Сараево.
TV21
