Претседателката Гордана Сиљановска-Давкова истакна дека се гледа напредок во евроинтеграциите на Македонија и дека постои можност за деблокирање на процесот. Како што изјави денеска, има напредок, а посебно ново е тоа што групата за поддршка на Западен Балкан е активна и предлага креативни решенија. Според неа, еден од можните исходи е отворање на патот за кластерите 2, 3 и 4.
Сиљановска-Давкова посочи дека процесот на интеграција не зависи само од Македонија, која, како што нагласи, веќе демонстрираше исклучителна кооперативност во однос на евроинтеграцијата. Но, за напредок, потребно е време, добра волја и континуирано градење на добрососедски односи.
Таа исто така посочи дека не може да препознае вето или слични закани во добрососедството, и изрази очекување дека во идните директни преговори ќе се разгледаат можните решенија.
„Да, гледам напредок. Процесот не зависи само од нас. Ние покажавме исклучителна кооперативност кога станува збор за нашата евроинтеграција. Треба да се водат разговори и преговори. Според моите информации, има напредок. Се сретнав со претседателот на Бугарија и нашиот дијалог е пријателски и разбран. Групата за поддршка на Западен Балкан е активна и има креативни предлози, кои би можеле да водат до отворање на патот за кластерите 2, 3 и 4“, изјави Сиљановска-Давкова.
Таа истакна и дека иако Македонија не е членка на ЕУ, земјата има целосно усогласена надворешна и безбедносна политика со Унијата. За успешен напредок, како што нагласи, неопходни се добрососедски односи, без ветото и заканите.
Сиљановска-Давкова учествуваше на настанот „Глобален женски појадок 2025“, организиран од Сојузот на хемичарите и технолозите на Македонија, по повод 11 февруари – Меѓународниот ден на девојките и жените во науката.
TV21
